İzmir ve Çevresinde Yunanlıların Türklere Uyguladığı Mezâlım Hakkında Demirci Mehmet Efe'nin Verdiği Bilgiler 

Aydın ve havalisi Kuva‑yı Milliye Umum Kumandanı Demirci Mehmet Efe tarafından İzmir Müdafa‑i Hukûk‑ı Osmaniyye Cemiyeti ve Düvel‑i İtilafiye Fevkalade Komiserlikleri’ne verilen bilgilere göre; işgalle birlikte Yunanlıların Türkleri sıkı bir takibe aldığı, esir olarak aldıkları Müslümanları burun, kulak ve cinsel uzuvlarını kesmek suretiyle işkence yaparak öldürdükleri, çok sayıda Türkü tutuklayarak hapse attıkları ve buralarda işkence altında katlettikleri, İzmir’de İslâm mahallelerini abluka altına alarak makinalı tüfeklerle taradıkları, silahlı Rumların sokaklarda gösteri yaptıkları, akşam sokakta rastladıkları Türklere ateş ettikleri...

30 Ekim 1919

İzmir

Müdâfa‘a‑i Hukûk‑ı Osmâniyye Cem‘iyeti

Merkez‑i Umûmîsi ‑ İstanbul

Asâlet‑me’âb,

Aydın ve havâlîsi Kuvâ‑yı Milliyye Umum Kumandanı Demirci Mehmed Efe imzâsıyla Denizli'den aldığımız 20/10/[1]919 târîhli âtîdeki telgrafnâme sûretini ehemmiyetle telakkî edilmesi istirhâmıyla arz u takdîm ve bu vesîle ile derin ihtirâmâtımızın kabûlünü istirhâm ederiz asâlet‑me’âb.

Sûret

Yunan kıtâ‘at‑ı askeriyyesinin Aydın vilâyetine çıkmaları asırlardan beri hüsn‑i mu‘âşeret üzre bulunan Türk  ve Rum unsurları içün mukaddime‑i şe’âmet oldu. Sizce de arzu edilmediğini kaviyyen zannetdiğim fecâyi‘in, bu günlerde artdığını ve Müslümanların şedîd ta‘kîbât altında kaldıklarını istihbâr ediyorum. Sırf Müslüman ve Türk olduklarından dolayı hukûk‑ı insâniyyeden mahrûmiyete mahkûm telakkî edilen kardaşlarım hakkında vukû‘a getirilen fazâyihin devâmı bize de aynı sûretle mukâbele hakkını veriyorsa da meslek ve terbiyemiz muktezâ‑yı hak ve adle ri‘âyet olduğuna nazaran şimdiye kadar akan kanları kâfî görerek insâniyetin ma‘rûz kaldığı felâketlere nihâyet verilmesi ve bu son ihtârın hüsn‑i telakkî edilerek İslâmlara vukû‘bulan ta‘arruzâta nihâyet verilmesine vâbestedir. Aksi hâlde mes’ûlünün ta‘yîni Düvel‑i Mu‘azzama'nın tahkîkâtıyla efkâr‑ı âmmenin takdîrât‑ı müstakbelesine kalır. Bâkî hürmetler efendim.

Der‘aliyye'de İzmir Müdâfa‘a‑i Hukûk‑ı Osmâniyye Cem‘iyetine

İzmir'deki Yunan Kıta‘ât‑ı Askeriyyesi Kumandanlığı'na keşîde etdiğim telgrafnâmenin bir sûretini aynen yazıyorum. Ben Yunanlılardan aldığım üserâ hakkında Türk kavm‑i necîbine lâyık bir sûretde mu‘âmelede bulunuyorum. Bunlar Nazilli'de kemâl‑i istirâhatle imrâr‑ı hayât etmekdedirler. Yunanîler ise taht‑ı işgâllerinde bulunan mahallerdeki ahâlî‑i İslâmiyyenin burnunu, kulağını kesmek ve hattâ bizden aldıkları bir esîri katletmeden evvel âlet‑i tenâsüliyyesini kat‘ ile ekl etdirmek gibi vahşet ve cinâyet irtikâb eylemekdedirler. Ben bi't‑tab‘ bu sûretle mukâbelede bulunmayacağım. Yalnız şu denâ’etin vesâtetinizle lâzım gelen makâmâta iblâğını ricâ ederim.

İzmir

Müdâfa‘a‑i Hukûk‑ı Osmâniyye Cem‘iyeti

Merkez‑i Umûmîsi ‑ İstanbul

Bir haftadan beri İzmir ile Yunan askerinin işgâli tahtında bulunan diğer mahallerde İslâmlara fevka'l‑âde hakâret ve birçoklarının dahi habs ve darb ve işkence edilmekde olduğunu kemâl‑i te’essüfle haber aldım. Ben şimdiye kadar hiçbir Ruma hakâret etmedim. Yakînen cürmünü bildiklerimi dahi selâmet‑i vatan nâmına afvetdim. Türkler anâsır‑ı gayr‑i Müslimeye karşı pek büyüklük ibrâz ediyorlar. Siz ise bunun aksini iltizâm ile Müslümanlara bilâ‑sebeb envâ‘‑ı hakâret ve zulmediyorsunuz. Bu hâle bir netîce verilmeyecek olur ise âkıbetin gâyet vahîm olacağı ve bu bâbda bana sür‘atle te’mînât verilmesini ehemmiyetle ihtâr ve cevâb intizâr ederim.

Der‘aliyye'de İzmir Müdâfa‘a‑i Hukûk‑ı Osmâniyye Cem‘iyetine

Sûreti bâlâda münderic telgrafı İzmir'de Yunan Kuvâ‑yı Askeriyyesi Kumandanlığı'na keşîde etdim. Cem‘iyetinizce de îcâb edenlerin sür‘atle nazar‑ı dikkatlerinin celbleri ve netîceden bana da ma‘lûmât i‘tâsını ricâ ederim.

Fî 27/28 Teşrîn‑i Evvel sene [1]335 Nazilli

Aslına mutâbıkdır                                                          Aydın ve Menteşe

Mühür                                                                   ve Havâlîsi Umûm Kumandanı

                                                                                   Demirci Mehmed Efe

İzmir

Müdâfa‘a‑i Hukûk‑ı Osmâniyye Cem‘iyeti

Merkez‑i Umûmîsi‑İstanbul

Sûreti Düvel‑i İ‘tilâfiyye Fevka'l‑âde Komiserliklerine
der‑dest‑i takdîmdir.

Nazilli: 29/30 /10/[1]335

Yunanlıların eyyâm‑ı ahîrede İzmir ve havâlîsinde ahâlî‑i İslâmiyyeye karşı tatbîk etdikleri mezâlim hakkındaki istihbârât‑ı mevsûka hulâsaten ber‑vech‑i zîr arzolunur.

Mâdde 1: 24 ve 25 Teşrîn‑i Evvel sene [13]35 Cuma ve Cumartesi geceleri nısfü'l‑leylde İslâm mahallâtı abluka altına alınarak makineli tüfenk ve silâh endâhtına başlanmış ve tayyâreler tayeran etmiş ve Yenikal‘a'dan da projektör tutulmuşdur. Bu esnâda yerli Rumlar müsellah olarak İslâm mahallelerinde dolaşarak nümâyişler icrâ ve 26 Teşrîn‑i Evvel sene [13]35 târîhinde ablukayı ref‘etmişlerdir.

Mâdde 2: 24 Teşrîn‑i Evvel sene [13]35 sâ‘at altıdan sonra Karşıyaka'da mukîm Keresteci Ali Bey'in hânesine on Yunanlı hücûm ederek mûmâ‑ileyhin yüzünü, kulaklarını kesdikden ve bütün eşyâ ve emvâlini yağma eyledikden sonra otuz bin lira vermesi içün de işkence yapmışlardır.

Mâdde 3: 24 Teşrîn‑i Evvel sene [13]35 gecesi Mûsevî mezarlığından evlerine giden iki İslâmı Yunanlılar arkalarından kurşunla şehîd etmişlerdir.

Mâdde 4: 25 Teşrîn‑i Evvel sene [13]35 Cumartesi günü akşamı sâ‘at dörtde bir Yunan jandarma neferi kemerin önünde kendi zâbitini katletmiş ve bu cinâyeti gûyâ balıkhânenin taraçası üzerine çıkan bir İslâm tarafından îkâ edildiği işâ‘a olunarak gelen geçen Müslümanlar üzerine çok silâh atılmışdır.

Mâdde 5: Medeniyet Gazetesi sâhibi Yunan Fevka'l‑âde Komiserliği tarafından tehdîd edildiğinden gazetesini ta‘tîle mecbûr olmuşdur. Muhtelit sansürün neşrine müsâ‘ade etdiği bir makâleden dolayı Doktor Yunus Fehmi Bey bir sene habs cezâsına ve iki bin drahmi cezâ‑i nakdî i‘tâsına ve Şark Gazetesi sâhibi Halil Zeki ve müdîr‑i mes’ûlü Kenan beyler de üçer ay habs cezâsına ve üçer yüz drahmi cezâ‑yı nakdî i‘tâsına mahkûm olmuşlardır.

Mâdde 6: Yunanlılar ellerine geçirdikleri münevver tabakayı tevkîf etmekdedirler. Şehir içinde şekâvet ve soygunculuk devâm ediyor.

Mâdde 7: Tire'de jandarma kumandanı, müstantık vesâ’ir ba‘zı me’mûrîn ile eşrâf ve ağniyâdan kırk elli kişi tevkîf olunarak envâ‘‑ı işkence ve sopalar altında ezilmekdedirler.

Mâdde 8: Ödemiş ve Tire kazâlarındaki jandarma efrâdımızın silâhları Yunanlılar tarafından toplatdırılmışdır.

Mâdde 9: Tire kazâsıyla Torbalı nâhiyesi, Turgudlu  ve Urganlı  karyeleri ahâlî‑i İslâmiyyesi Yunanlıların zulüm ve soygunculuğundan bîzâr olarak mütemâdiyen hicret ediyorlar. Hicret edenler perîşân bir hâlde ölüme mahkûmdurlar. Yunanlıların mezâlimi artık tahammül edilemeyecek bir râddeyi bulmuşdur. Ben buraca İzmir'de Yunan Kıta‘ât‑ı Askeriyyesi Kumandanlığı'nı tazyîkden hâlî kalmıyorum. Bu bâbda cem‘iyetinize şimdiye kadar müte‘addid telgraf yazdım. Bunların vâsıl olup olmadığını ve ne gibi teşebbüsâtda bulunulduğunu öğrenmek isterim. Bunlardan başka mücâhidînin muvaffakiyâtına dâ’ir her gün telgrafla ma‘lûmât veriyorum. Acaba alınıyor mu ? Sâ‘at ve dakîkalarıyla berâber cevâb‑ı âciline muntazırım efendim.                                                                                                                                   

                                                                                                 Aslına mutabıkdır

                                                                                                         Mühür